McGregor deklaratë zyrtare pas incidentit në Bellator, ku sulmoi gjyqtarin
Conor McGregor hyri në kafaz për të festuar fitoren e shokut të tij të skuadrës Charlie Ward (mundi me KO teknik John Redmond), por përfundoi duke fyer dhe sulmuar gjyqtarin e këtij dueli, Marc Goddard. Gjithçka ndodhi në Bellator 187 zhvilluar në Dublin të Irlandës, me forcat e sigurisë që kanë nxjerrë jashtë kafazit me forcë kampionin u arteve marciale mikse. Pas këtij skandali, u përfol se irlandezi është lënë jashtë eventit të UFC-219, që zhvillohet më 30 dhjetor në Las Vegas e ku McGregor duhet të mbrojë titullin kampion bote në peshën e lehtë.
Irlandezi, përmes një mesazhi në faqen e tij zyrtare në Instagram, ka reaguar pas incidentit: “Sinqerisht kërkoj ndjesë për sjelljen time në eventin e zhvilluar në Dublin. Doja të mbështetja shokun e skuadrës dhe mikun tim dhe lashë emocionet të më përfshijnë në atë incident. Si kampion i dyfishtë i botës, si një menaxher dhe si një figurë publike kërkoj ndjesë, pasi standarti i sjelljes time duhet të jetë më i lartë”, ka qenë komenti i McGregor, që u ka kërkuar falje të gjithëve, duke konfirmuar respektin që ka për të gjithë aktorët që punojnë në UFC.
