India e humb të drejtën e organizimit të botërorit
April 29, 2020
0 comments
Share

India e humb të drejtën e organizimit të botërorit

India të martën e ka humbur përfundimisht të drejtën e organizimit të Kampionatit Botëror për boksierë, që është dashur të mbahet vitin e ardhshëm në New Delhi.

Vendimin e mori Federata Ndërkombëtare e Boksit Amator (AIBA), raporton Koha.net. AIBA ka vendosur që Botërori për boksierë të organizohet në Beograd.

New Delhit i është marrë e drejta e organizimit pasi nuk ka përmbushur obligimet, përkatësisht nuk ka paguar tarifat e organizatorit. Kështu AIBA e ka shkëputur kontratën me Indinë.

India në korrik të vitit 2017 e mori të drejtën e organizimit të Botërorit 2021. Por më pas u fut në konflikte me shtëpinë botërore të boksit amator. Së pari përplasjet u paraqitën pas diskriminimit që India ia bëri boksieres kosovare, Donjeta Sadiku, duke mos e lejuar të garojë në Botërorin e vitit 2018. Në fakt India dy herë ia ka ndalur Donjetës pjesëmarrjen në Botëror, një herë për juniore e një herë për të rritura.

“AIBA kishte thënë se do të rihapë procesin për të vendosur organizatorin e Botërorit 2021, pasi në nëntor të vitit 2018, boksieres nga Kosova Donjeta Sadiku nuk iu lejua pjesëmarrja”, ka shkruar të martën agjencia indiane e lajmeve, IANS.

AIBA në fakt kishte kërcënuar se do të rikonsiderojë vendimin që Botërori të mbahet në Indi, duke reaguar kështu në diskriminimin ndaj boksieres më të mirë kosovare.

Kryetari i Komitetit Olimpik të Kosovës, Besim Hasani, ishte shumë i përfshirë në atë proces. Ai është i bindur se diskriminimi ndaj Donjeta Sadikut ka ndikuar në vendimin e AIBA-s.

“Federatat e mëdha ndërkombëtare nuk harrojnë gjëra të tilla. Shteti i Indisë kishte keqpërdorur besimin e AIBA-s. India nuk ishte korrekte dhe po paguan çmimin. Unë sinqerisht besoj shumë se diskriminimi ndaj sportistes sonë ka ndikuar në vendimin e AIBA-s dhe raportet e kësaj organizate me Indinë”, ka thënë Hasani për Koha.net, të martën mbrëma.

“Sjellja jokorrekte e Indisë ishte në instancat politike, përkatësisht nga Qeveria e këtij vendi. Organizatat sportive të Indisë kishin bërë përpjekje, por pa rezultat. Ne së bashku me Federatën e Boksit të Kosovës kishim shkruar një letër për AIBA-n duke kërkuar që të anulohet i gjithë kampionati, të gjitha rezultatet. Kishte bërë jehonë ajo letër”, ka shtuar Hasani.

Comments

No Comments Yet! You can be first to comment this post!

Write comment

Your data will be safe! Your e-mail address will not be published. Also other data will not be shared with third person. Required fields marked as *